SU SARRABESU, Sa rimpatriada de Piriccu e Franciscu
A Piriccu, oramai bécciu, no ddi fu’ pattu beru de ’n d’essi potziu torrai a bidda. Dogna mengiahu, mruzada e poi ’n ci ’essaia’ de ’omu e andàda a si setzi in d’uhu ’ngrohi de sa prazza de municipiu; po pigai friscu; asutta de uha matta.
A issu ddi praxiad’a abarrai a sohu po si higgi su giornali: ma sa cosa no dd’arrennescìa’ mai. Comenti ’ompiada, arribà’ subitu cahancuhu chi si pohiad’ a chistiohai.
Uha dì si furiad’ presentau Franciscu, uhu cumpàngiu de scoha chi non biada de pru’ de xinquant’annusu.
“Tui se’ Piriccu!… Ancora biu sesi!”. “Arrori ti scroxidi, e ita mi ’ohìasa, mottu? E chihi dimmoriu se’ tui?”. “Non t’arregodasa de mei?… Seu Franciscu!… Cussu Franciscu chi t’a’ pottàu a s’ambulatoriu sa dì chi seus’ andaus’ a furai figu in s’ottu de tzi’ Ogennia. T’arregòdasa? Tui ias’imbruncuhau e ti furiad’intrau ’hu punciohi in su pei”. “Ah!… Franciscu sesi!… Mamma mia! Non ti apessi mai riconnottu!”. “Be tehi passientzia, cinquant’annusu ti ddus càmbianta ’s connottausu. Tui inveciasa as’allogau cussa facc’ ’e tontu de candu furiasa piccioccheddu.” “Facc’ ’e tontu a mei? Tocca, cittidì, scimprottu! No mi fatzasa chistiohai de su gradu de s’intelligentzia tua.” “Be, ma poi seu’ crésciusu. Immoi non seu’ prusu su chi furiausu candu giogaiàusu in custa prazza cun cussa boccia fatta de tzappuhusu.” “Mamma mia!… Ti ’n d’arregodasa: currendi a peisi scrutzusu in sa giarra…; cos’ ’e maccusu!” “Tocca, mandrohi, pesadìndi ca andaus’ a buffai!” “Ah!, biu ca su fitziu t’est’abarràu: andaus’a buffai!… T’arregòdasa candu ’esseiausu su homihigu a croppeddì po castiai ’s femihasa chi ’essìant’a fai sa passillada po si fai castiai? Furiasu sempri setti o ottu puru. I buttegasa parìanta statziohisi de sa Via Crucis: si frimaiàusu e a turnu pagaiàusu. Buffaiàu’ puru sentz’ ’e tenni gaha po no offendi su chi torra’ su cumbidu; e non furriaiàus’ a domu fintzas’ a candu no ianta cumbidau tottusu. A bottasa cahancuhu s’imbriagàda e cacciàda in sa ’ia prima de arribai a domu sua.” “Tandu, ti decidisi a ti ’n di pesai?” “E innui si setzéusu, aintru o in forasa.” “Adessi mellusu ’n forasa; ca aintru ddu e’ sa televisiohi ca mi ’oha fastidiu.” “E ita buffasa tui?” “Birra e gazzosa! E tui?” “Uha tassa de bihu biancu.” “Balla, non si seusu spostau’ meda: birra e gazzosa , bihu biancu, acquadrenti o cannonau… Ti ’n d’arregodasa?” “Naràusu ca no mi ’n di seu scaresciu!” “T’arregòdasa comenti furia’ sa pratza candu furiau’ piccioccheddusu?” “Certu ca m’arregodu: uhu mantu de giarrixedda ingiriada de mattasa de eucaliptus.” “Ti praxidi coment’est’immoi?” “No mi dispraxidi; ma iapessi preferìu chi essinti hassau su monumentu in cantu furia’ prima; ca furia’ prusu in vista.” “E a mari ddu i andasa?” “No mi chistiohisi de mari ca mi fais’ inchiettai!”“Inchiettai po ita?” “Nosu teheusu ’ha miniera de oru e non si ’n di seus’ancora sapìusu. Portu Coraddu, Sant’Uanni, Colostrai… Spiaggiasa chi in s’istàdi si prehinti de genti chi no agattada uha pinnétta po fai acqua o uhu xestihu po ’n ci fuhiai s’ahiga.” “E it’ianta depi fai segundu tui. Castia ca po attretzai uha spiaggia libera, in cantu nisciuhusu pagad’uhu francu, costa’ meda. E de innui ddu piganta su hihari e comenti dda ricuperanta sa spesa?” “E ita ’n di fainti de is tàssasa chi pàganta cussusu chi tehinti i’ domusu in mari? Castia ca non c’iad’a bolli meda po fai duas pinnéttasa e ponni uha parìga de xestihusu dognia tanti metrusu de spiaggia. Poi su ’ihari ddu recuperasa fendi struttùrasa chi s’aberinti cun cinquanta xentesimusu.”“E sa puhizia?” “Be, certu ca cussa est’uha cosa difficihi: bastad’a ponni uhu de cùssusu chi funt’impiegausu po i lavori socialmente utili e su giogu e’ fattu.” “Nara, bellixéddu: deu ia bolli biri a tui illimpiendi pinnéttasa po genti chi passa’ tottu sa dì fuhìada in sa spiaggia.” “Tandu non ti chexisi ca no agàttasa traballu. Bohi nai ca bisongiu de traballai non di tehisi. Ddu scisi cantu medra apu pappau ’eu in su traballu miu? E depìa hai puru ca furia’ boha e fai biri ca mi praxiada.” “Be, chi serrasa ’s ogusu e ti tappasa su hasu, e’ comenti papai marmellata.” “E immoi chihi pàgada?” “Certu ca pagai toccad’ a pagai… Hohisi pagai tui?” “Deu no ddu creu!”
Albino Agus (ilsarrabus.news)
Related Posts
SU SARRABESU. Arregordendi s’arrollieddu de Porto Tramatzu →
SU SARRABESU. Sa scrobetta de uh’eccellenza sanitaria in Sardgna esti stada uha bella soprpresa →
