SU SARRABESU. Sa scrobetta de uh’eccellenza sanitaria in Sardgna esti stada uha bella soprpresa
Occannu, po mori de su Corona virus, seus’abarrausu in bidda po passai innoi s’ierru puru. Nosu pentzaiausu ca de su mes’ ‘e Adamihi a su mes’ ‘e Maiu, ‘n ci fessi’ pagu movimentu; antzisi, nudda. Inveciasa eu’ biu uha ‘idda bia sempri in movimentu. Furìanta sessantadus’annusu chi ‘eu non passa’ s’ierru innoi e apu biu ca in bidda s’ierru non c’esti. Candu non c’e’ bentu pari’ sempri primavera. Meda’ bottasa mi domandu po ita mi ‘n di se’ andau. Sa sardegna est’uhu paradisu; ma bisongiad’ a sind’andai po ddu cumprendi.
Ma gei ddu sciu po ita mi ‘n di se’andau: Babbai cun nonnu e atrus fradisi de nonnu, furìanta artigiahusu lateritziusu. Fianta tehuasa, mattohisi, mattohellasa, marigasa, sciveddasa. S’atti ‘n soru si podid’ancora biri in s’omu chi anti fattu in via Mazzini. Cun s’industrializzatziohi de i letteritziusu funt’abarrausu sentz’ ‘e traballu e ‘n d’anti depiu sciusciai ‘s fòrrusu e serrai buttega. Tandu babbai e’ passau da artigiahu a operaiu; e traballàda fetti candu ddi essia’ cahancuha giorrohada.
Poi est’arrennésciu a intrai in Baccu Locci. Uha bella dì, visita medica e radiografia anti dcretàu silicosi. Licentziamentu sentz’ ‘e cassa integrazione nè reddito di cittadinanza; aspettendi sa pentziohi de invalididadi.
Mamma furia’ disperada e fia’ sa spesa a depidu.
Deu, scienti maist’ ‘e pannu, non pottà hudda a domu; e mi ‘n di parìa’ bregungia de mi setzi a sor’ ‘e sa mesa po xiccai cos’ ‘e pappai. Apu fattu domanda de anticipo leva e mi ‘n di seu andau: mellus’ a passai se’ mesisi in prusu in caserma pappendi, chi fendi fammihi innoi. Fihiu su militari seu abarrau a Torino po traballai in sa Fiat.
Bivendi in su settentriohi si pèntzada de essi fortuhausu po ita ca ddu i funti is eccellentza’ sanitariasa. E in d’uh’ eccellentza sanitaria torinesa aggiummai m’anti mottu. Su dottori chi mad’operau de colecisti m’adi stampàu s’intestihu e non si ‘n d’ e’ sapìu. Conseguenza: peritonite, setticemia, coma e bint’uha disi de rianimatziohi.
Sciendi ca medasa, po si curai, pàrtinti de sa Sardegna e bàntanta a Torino, Milano, Bologna e in meds’atru’ logusu chi ddu i tehinti eccellentza’ sanitariasa, uhu si fai’ s’idea cha sa sanità sarda siada scadenti.
Ma ascuttai custa: in su mes’ ‘e ‘adamihi 2016 apu tentu uha trombosi a s’ogu derettu. In su mes’ ‘e austu 2017, in Sardegna, ischemia; sempri a s’ogu derettu. In cussu periudu apu cannottu s’oculista santuidesu dottor Alberto Cuccu ca m’a’ diagnosticau sa, sopraggiunta ischemia. Mi seu fuiu a Torino; m’anti ricoveru e m’ant’ operau de glaucoma e cataratta; procuradasa de is punturasa chi m’ianta fattu a s’ogu.
Pobidda mia, a Torino, furiada in lista d’attesa po fai s’operatziohi de cataratta. Ma de su momentu chi ti pohinti in lista, a su momentu de fai s’operatziohi, bisòngiad’ aspettai dus’ annusu. E issa iad’essi dépiu aspettai ancora uh’annu. Occannu a’ tentu disturbusu a is ogusu e est’andada, issa puru, a passai uha visita oculistica.
Dottor Cuccu dd’ a’ nau ca furia’ora de s’operai de cataratta e dd’a prenotàda, in pari cun mei e uh’atra signora de Porto Corallo, po fai s’operatziohi, in sa Clinica Sant’Elena, Korian, de Quartu Sant’Elena.
Su tempusu de arribai de Santu Idu a Biddeputzi, uha parigh’ ‘e mihutusu appustis’ ess’arribausu a domu, est’arribada uha telefohada de patt’ ‘e sa Clinica Sant’Elena ca s’ a’ dohau s’appuntamentu po sa visita de prericoveru. Tempu du’ mesisi, pobidda mia e s’atra signora anti fattu sa cataratta a tott’ a i’ dus’ ogusu. A mei no mi dd’anti fatta causa piastrinopenia.
Nosu, spantausu, cosa de non crei, eusu sperimentau uh’eccellenza sanitaria in Sardegna. Sa Clinica Sant’Elena bella: lind’ e pinta! Ottima accoglienza! Dottorisi e infermierasa gentilissimusu e garbausu comenti si ‘n di binti pagu in atru’ logusu considerausu “eccellentzasa”. Ddus’ fueddusu ddu su ‘ollu spendi po s’uspidahi San Marcellino de Muravera puru: donni’ otta chi eu’ tentu bisongiu de ddu’ andai, si seus’agattau’ sempri behi.
Si fai scioperu iad’ a zrebìri po fai torrai in piena efficenza su San Marcellino de Muravera, mi a ponni spollincu in pitz’ ‘e su pont’ ‘e ferru.
Albino Agus
(ilsarrabus.news)
:
Related Posts
SU SARRABESU. Arregordendi s’arrollieddu de Porto Tramatzu →
SU SARRABESU, Sa rimpatriada de Piriccu e Franciscu →
